FORMOLA TA’ PREVENZJONI DV
Il-liġi
l-ġdida dwar il-prevenzjoni tal-vjolenza domestika qed iservi bħala għodda u
appoġġ ġdid lil dawk il-persuni li jistgħu jkunu f’riskju ta’ vjolenza
domestika. Permezz ta’ din il-liġi, persuni li jkunu f’relazzjoni intima
jistgħu jissottomettu applikazzjoni mal-Aġenzija tal-Vittmi tal-Kriminalità jew
mal-Pulizija biex jivverifikaw jekk is-sieħeb tagħhom għandux storja ta’
vjolenza domestika. Il-persuna tingħata biss informazzjoni dwar jekk is-sieħeb
instabx ħati mill-qorti fuq każ ta’ vjolenza domestika u mhux
allegazzjonijiet li jkunu saru jew kawżi pendenti quddiem il-Qorti. Applikant
li jrid jaċċessa l-informazzjoni irid isegwi kriterji speċifiċi stabbiliti
b’din il-liġi. Ir-risposta lill-applikant tingħata fi żmien sebat ijiem, u jekk
meħtieġ, jinħareġ ukoll avviż ta’ twissija dwar ir-riskju. F’dan il-każ,
il-Pulizija fi ħdan l-Aġenzija se tispjega wkoll ir-raġunijiet dwar ir-riskju
fejn tidħol vjolenza domestika, filwaqt li l-professjonisti fi ħdan l-Aġenzija
għall-Vittmi tal-Kriminalità se jipprovdu informazzjoni dwar is-servizzi ta’
appoġġ disponibbli.
Persuna tista’ tissottometti applikazzjoni online fuq din il-paġna jew tapplika
personalment fl-Aġenzija għall-Appoġġ għall-Vittmi (52, Triq it-Teatru l-Antik,
Valletta).
